警告: 該文章怨氣極重, 從事會計行業及心情不佳者, 請勿觀看.

呢幾年, 差唔多有9成interview, 個interviewer都一定問我點解之前d工做1-2年咁短時間, 點解咁jumpy, 點解會返頭做同一間公司, 點解中途轉行, 點解呢1兩年會做temp同parttime?  俾人問得多, 真係有d懷疑, 點解我咁jumpy之前d公司都會請我? 有d仲要返頭請.  要係一間公司做幾多年先算唔jumpy呢? 點先叫stable? 點解唔可以做temp.同parttime, 一定要perm.先可以做?

呢10年咩環境, 大家唔會唔知, 尤其呢幾年更恐怖, 我又夠想唔jumpy啦! 但俾你stable咁做一份工10年8載, 然後出黎只識做1-2 part嘅野, 咁stable係咪真係有用?

我曾幾做過一間中資大公司, 如果我甘心只做一個掛名account嘅data entry, 日日自閉係公司入機同filling, 我諗我應該可以做過世添.  又好似我之前做過果份temp.咁, 老頂話佢係某大銀行出黎, 結果連個account software買左幾多個user都唔識睇......你唔係做it我都唔係, 睇銀碼咪知囉老頂!  其他野就更加唔駛講.  佢除左船頭驚鬼船尾驚賊, 船中間驚火炾, 船底驚穿隆之外(多謝阿貓提供金句), 最勁就係卒人交野.  有一份仲勁, 果位係一間細公司做左超過10年以上, 老細話佢係由低做起嘅manager, 除左識同老闆打小報告同點人做野之外, 仲有本事攪到auditor懷疑間公司盤數有問題.  呢d咁唔jumpy咁stable嘅人, 真係人才之中嘅人才.

我唔係要怨生不逄時, 因為經濟唔好行行都係咁, 但點解做account就一定要stable? 點先算stable先? 仲有就係我academic唔夠你嫌我無料, 我去讀書你嫌我要返學無乜時間開ot, 我開個價你嫌我貴, 我壓價你就覺得我有問題.  我知呢幾年大把小朋友覺得會計有專業有錢有前途.  唔好話小朋友, 好多年紀唔細但對呢行好有憧憬嘅人我都見唔少.  唔知點解, 我硬係覺得會好似之前it咁, 又或者好似之前個股市咁, 當全民皆股嘅時候, 就離跌市呢一日不遠. 

大把人掙住入行, 最大得益者咪就係攪course果班同d老細, 因為將會有大量廉價勞工供應, 君不見逼科點壓價點克薄都大把人爭住入去.  無他, 因為有希望嘛!  做人有希望係好, 但係除非你做audit, 否則一個唔識賺錢嘅部門, 9成9老細都唔會放錢落去, 亦因為佢只係一個駛錢嘅部門, 係公司嘅地位一定會低, 咁萬一有乜冬瓜豆腐, 你話邊個部門會出事先丫嗱? 呢個世界, 唔係咁多人可以順風順水, 一帆風順.

我認我陰謀論, 所以我係時候要再培訓, 希望我報左嘅course下個月可以開得成.  更希望讀完可以順利轉行.  因為, 當我發現投資(讀書考試)不等於或大於回報(人工), 就算只蝕離場, 從頭開始, 都比一直等運到, 唔知幾時歸本好得多.